14:58 - 23 Janar 2023

Si pasojë e reshjeve të mëdha të shiut të enjtën që lamë pas, disa komuna të Kosovës u vërshuan. Skënderaj, Istogu, Klina e Mitrovica pësuan dëme të konsiderueshme materiale. Fatmirësisht nuk ka asnjë jetë të humbur.

Në komunën e Klinës shumë familje janë evakuuar nga shtëpitë e tyre.

Pas vërshimeve, atyre iu janë dëmtuar shtëpitë e pronat.

Kryetari i Klinës, Zenun Elezaj i ka thënë Insajderit se ende nuk e dinë vlerën e dëmeve të shkaktuara, por që vlerësimi është duke u bërë.

“Vlerësimi i dëmeve materiale të shkaktuara në pronat private dhe publike në komunën tonë ka filluar të bëhet”, ka thënë Elezaj.

Sipas tij, rreth 1 mijë familje janë evakuuar nga vendbanimet e tyre.

Elezaj ka theksuar se ekziston rreziku që Klina të vërshohet përsëri gjatë ditëve në vazhdom.

“Aktualisht niveli i lumenjëve nuk është i lartë. Por, nëse reshjet vazhdojnë për shkak të konfigurimit dhe numrit të madh të lumenjëve që derdhën, qyteti jonë është më i rrezikuari në vend”, është shprehur Elezaj.

Komunat e përmbytura i ka vizituar edhe kryeministri, Albin Kurti. Ndërkohë, pritet që Qeveria e Kosovës të ndajë mjete për rregullimin e dëmeve. /Gazeta Insajderi