Trajtimi i rasteve të komunitetit LGBT nga sistemi i drejtësisë në Kosovë, nuk bëhet në mënyrën më të mirë të mundshme.

Prokurorja e shtetit, Drita Hajdari, tha se janë duke u procesuar disa raste të LGBT-së, duke shtuar se akoma ka probleme në identifikimin e viktimave të këtyre rasteve.

“Duhet të vetëdijesohen prokuroret në shqyrtimin e këtyre rasteve, sepse kërkojnë një shqyrtim më të veçante se rastet tjera”, ka thënë prokurorja Hajdari.

Ajo ka thënë se këta persona nuk duhet të ngurojnë që ta deklarojnë orientimin e tyre seksual, duke thënë se kjo është parësore për ta vazhduar hetimin e rastit që ka të bëjë me LGBT.

Ndërsa Biljana Rexhiq, gjykatëse, tha se sistemi i drejtësisë nuk e ka kryer punën si duhet në trajtimin e këtyre rasteve.

“LGBT është duke u përballur me shumë sulme verbale dhe fizike, dhe këtu i ka fajet edhe shteti i cila duhet të mbrojë të drejtën e çdo qytetari, pa përjashtuar orientimin e tij seksual”, ka thënë ajo.

Sipas saj, deri në vitin 2013 as nuk është bërë fjalë që ekziston grupi LGBT.

Përfaqësuesja nga institucioni i Avokatit të Popullit, Merita Syla, tha se të drejtat e komunitetit LGBT janë të mbrojtura me kushtetutë. Ajo tha se nga takimet që i kanë mbajtur me grupin e këtij komuniteti, konsiderojnë se nuk mbrohen aq sa duhet të drejtat e tyre.

“Avokati i Popullit i bënë thirrje Qeverisë që të merren masa ndaj trajnimit të komunitetit LGBT. Gjuha e urrejtjes shkel të drejtat e çdo qytetari”, ka thënë Syla.

Po ashtu, Salih Dragidella, përfaqësues i Policisë së Kosovës, tha se komuniteti  LGBT është pjesë e shoqërisë, duke thënë se rastet e tilla policia i trajton si të gjitha rastet tjera të qytetarëve.

“Policia është e detyruar që t’i respektojë të drejtat e të gjithë qytetarëve të saj, ndërsa grupi LGBT duhet të kontaktojë për çdo rast që u ndodh me policinë”, tha Dragidella.

Ky diskutim i mbajt sot nga Qendra për Zhvillimin e Grupeve Shoqërore, me temën “Trajtimi i rasteve LGBT në sistemin Kosovar të drejtësisë”./Insajderi.com