Bashkimi Evropian ka kërkuar që të garantohet lëvizja e lirë dhe e papenguar në pjesën ku serbët lokalë kanë filluar ndërtimin e një muri afër urës së lumit Ibër.

Përmes një komunikate dërguar medieve pas takimit me delegacionet e Kosovës e Serbisë, BE ka thënë se ka diskutuar çështjet e mbetura pezull lidhur me marrëveshjen e arritur në gusht të vitit 2015, por që të dy palët janë pajtuar për të harmonizuar dizajnin e projektit.

BE ka thënë se revitalizimi i asaj pjesë nënkupton edhe lejimin e lëvizjes në mënyrë të lirë dhe të papenguar.

“Të dy palët janë pajtuar për të harmonizuar dizajnin e projektit për rivitalizim të urës së Mitrovicës dhe për projektin e këmbësorëve në rrugën ‘Mbreti Petar’. Ato janë pajtuar që rrethrrotullimi në Mitrovicën e veriut të lidhet me rrugën e këmbësorëve ‘Mbreti Petar’ duke i lënë të gjithëve hapësirën e lirë për lëvizje, derisa ka adresuar shqetësimet mbi sigurinë në rrugë”,thuhet në një komunikatë për media të BE-së.

“BE do të mbesë në kontakt me dy palët për të siguruar implementimin e marrëveshjes së gushtit 2015 dhe implementimin e marrëveshjes nga gushti 2016 dhe ka mirëkuptim nga të dy palët që më 20 janar, afati i fundit, për rihapje të urës dhe të projektit për kthimin e “Mbretit Petar’ në rrugë të këmbësorëve të përmbushen”, thuhet tutje në komunikatë.