Komisionit për të Drejtat Njeriut, Barazi Gjinore, për Persona të Pagjetur dhe Peticione sot do të mbajë mbledhje në të cilët pritet të shqyrtohet peticioni me 23 mijë e 774 nënshkrime të qytetarëve që kërkojnë mbajtjen e një seance të jashtëzakonshme për rastin e vdekjes së aktivistit të Lëvizjes Vetëvendosje, Astrit Dehari në Qendrën e Paraburgimit në Prizren.

Në seancën e fundit të Kuvendit, kreu i saj, Kadri Veseli, pati thënë se peticioni nuk është dërguar në Kryesinë e Kuvendit, duke u arsyetuar kështu për moscaktimin e një seance të jashtëzakonshme.

Por, njëra prej organizatorëve të peticionit nga shoqëria civile, Besa Luzha, në një postim në facebbok, e pati quajtur si gënjeshtër deklaratën e Veselit.

Megjithatë, Lëvizja Vetëvendosje pati dështuar dy herë për t’i mbledhur 40 nënshkrimet e deputetëve të cilat mjaftonin për thirrjen e një seance të jashtëzakonshme.

Në rastin e fundit kur Vetëvendosje mblodhi 40 nënshkrime, ishte deputeti Danush Ademi i cili e kishte tërhequr nënshkrimin, duke e pamundësuar thirrjen e një seance të jashtëzakonshme./Insajderi.com