Kryetari i Partisë Demokratike të Kosovës, Memli Krasniqi, ka lënë të kuptohet qartë se partia që ai udhëheq nuk do të mbështesë Fatmir Limajn për kryetar të Kuvendit, nëse ky i fundit zgjedh të bashkëpunojë me Albin Kurtin, shkruan Insajderi.

Krasniqi tha se nuk i takon PDK-së të gjykojë partitë tjera për vendimet që marrin.

“Fatmir Limaj duhet me vendos vet për të ardhmen e tij politike. Nëse ka ardhmëri politike me Albin Kurtin, atëherë normal që nuk mundet me marrë mbështetje prej nesh. Nuk është ndonjë nder i madh me të propozu Albin Kurti,” tha Krasniqi në emisionin Pressing në T7.

Kreu i PDK-së u shpreh i bindur se Kurti nuk do të arrijë të formojë Qeverinë, duke shtuar se Limaj duhet të jetë i kujdesshëm para se të bëjë ndonjë marrëveshje.

“Unë i kam thënë edhe në takim: neve s’na takon me i gjyku partitë e tjera, por është mirë të mos ngutet. Kushtetuta parasheh edhe një mundësi tjetër për formimin e Qeverisë – le të presim,” tha ai.