Kryetari i Partisë Demokratike të Kosovës, Memli Krasniqi në 33 vjetorin e ngjarjes më të madhe për faljen e gjaqeve në Verrat e Llukës në Komunën e Deçanit, ka shprehur mirënjohje për gjithë atë veprimtar, patriot e intelektualë që u bënë bashkë për Kosovën në këtë nismë.

Sipas kreut të PDK-së kjo lëvizje popullore u bë kthesë për bashkim e unitet mbarëshqiptar.

“Kjo lëvizje popullore në krye me profesorin dhe atdhetarin Anton Çetta u bë pikë kthese për bashkim e unitet mbarëshqiptar, duke i dhënë fund gjakmarrjes, vëllavrasjes dhe ngatërresave mes vete, për t’u mbledhur rreth një qëllimi më madhor e jetik, që ishte lufta për liri”.

Në këtë tubim madhështor më 1 maj 1990 morën pjesë rreth gjysmë milion shqiptarë, me ç‘rast u falën më shumë se 100 gjaqe dhe ngatërresa ndër-shqiptare.

Aksioni për pajtimin e familjeve shqiptare në hasmëri kishte nisur nga disa studentë të rajonit të Dukagjinit, ish-të burgosur politikë, më 2 shkurt 1990 në Lumëbardhë të Deçanit.

Ky aksion u shndërrua në një lëvizje për pajtimin e gjaqeve dhe falë punës së madhe të veprimtarëve në krye me Anton Çettën kjo lëvizje gjithëpopullore arriti të pajtojë familje të cilat falen mbi një mijë gjaqe e ngatërresa ndër-shqiptare.