Ministrit të Bujqësisë, Pylltarisë dhe Zhvillimit Rural, Memli Krasniqi i është miratuar sot propozimi që në kuadër të Projektligjit për Tatimin në Pronën e Paluajtshme, të mos ketë pagesë të tatimit për tokat bujqësore që janë në kultivim apo përdorim për kulturat e ndryshme bujqësore.

Lidhur me miratimin e këtij projektligji Krasniqi ka falënderuar kabinetin qeveritar.

“Falënderoj kolegët nga kabineti qeveritar për miratimin e propozimit tim që në kuadër të Projektligjit për Tatimin në Pronën e Paluajtshme, të mos ketë pagesë të tatimit për tokat bujqësore që janë në kultivim apo përdorim për kulturat e ndryshme bujqësore. Pra, me Projektligjin e miratuar sot, fermerët nuk do të paguajnë tatim për tokat që i punojnë”, ka shkruar Krasniqi në llogarinë e tij në Facebook.

Sipas Krasniqit kjo do të jetë një stimulim më shumë për të punuar tokën nga fermerët.

Ky është mbi të gjitha një vlerësim për punën dhe mundin e fermerëve tanë dhe një stimulim më shumë për ta punuar tokën. Besojmë se edhe deputetet do ta japin përkrahjen e tyre për këtë Projektligj, ashtu siç e kemi miratuar sot në qeveri”, ka shkruar ai./Insajderi.com