Zëvendëskryeministri i parë i Kosovës, Hajredin Kuçi, ka deklaruar se për ratifikimin e marrëveshjes së demarkacionit me Malin e Zi duhet të krijohet konsensus nacional.

Ai ka bërë me dije se kjo çështje nuk i takon vetëm një individi apo një partie, por të gjitha subjekteve politike.

Në një intervistë dhënë gazetës “Epoka e re”, Kuçi ka vlerësuar se nuk ka nevojë të ketë hendek për çështje nacionale në mes të pozitës dhe opozitës.

Sa i përket koalicionit qeverisës, Kuçi ka treguar se, pavarësisht sfidave, Qeveria ka pasur një performancë të mirë për realizimin e programit të përbashkët.

Ai ka folur edhe për pozitën e ministrit të Drejtësisë, duke bërë me dije se pjesën më të madhe të autorizimeve i ka bartur tek zëvendësministri Lirak Çelaj.

Kuçi ka thënë se pret që shumë shpejt kryesia e Partisë Demokratike të Kosovës të vendosë për emrin e ministrit të ri të Drejtësisë.