×
  • Lajme
  • Lajme

    Kundër Korrupsioni mbyll rastin e Canollit të PDK-së

    Insajderi
    10 February 2016 - 11:07

    Agjencioni Kundër Korrupsion ka vendosur që të mbyllet rasti kundër kryeshefit ekzekutiv të “Termokos” dhe anëtarit të bordit të ndërmarrjes “Aeroporti i Gjakovës”.

    Konkludoi se ka kufizime por nuk ka konflikt faktik të interesit në ushtrimin e  këtyre dy funksioneve publike.

    “Zyrtari i lartë z. Canolli mund të gjendet në situata të konfliktit “rast për rast” të interesit, por në raste të tilla ai është i obliguar që ta bëjë deklarimin e atyre interesave dhe të tërhiqet nga vendimmarrja”, thuhet në vendimin e Agjencisë Kundër Korrupsion, të publikuar dje më 9 shkurt.

    Kundër Korrupsionit konkludoi se është i paqëndrueshëm pretendimi se Canolli mban edhe postin e tretë publik- Drejtor i Gazetës Zyrtare në Zyrën e Kryeministrit.

    “z. Canolli ka sjellë në AKK dëshminë zyrtare-vendimin nga sekretari i Zyrës së Kryeministrit- që ai tashmë ka bërë pezullimin e dakorduar të marrëdhënies së punës në Shërbimin Civil”, thuhet në vendimin e Agjencisë Kundër Korrupsion.

    Ardhja e Canollit në krye të këtyre dy ndërmarrjeve publike është kritikuar nga opozita e shoqëria civile.

    Ai ka të kaluar politike. Është zgjedhur anëtar i Këshillit Drejtues të Partisë Demokratike të Kosovës më 18 mars 2013. Emri i tij ende figuron në faqen zyrtare të PDK-së, ndonëse ka marrë nën drejtim dy ndërmarrje publike.

    Ligji për ndërmarrje publike parasheh ndalesa për personat me të kaluar politike.

    Nuk lejon që në postin e anëtarit të bordit të emërohet një person që është përfshirë në politikë, në 36 muajt e fundit.

    Por Canolli morri postin e anëtarit të bordit ende pa kaluar 36 muaj nga zgjedhja e tij në Këshillin Drejtues të PDK-së, organin më të lartë të kësaj partie.

    Klikoni Këtu për t'u bërë pjesë e kanalit zyrtar të Gazetës Insajderi në Viber.
    OP-ED
    Nga Rubrika

    © 2016-2024 Gazeta Online Insajderi - Të gjitha të drejtat e rezervuara.

    Impressum

    Kontakt

    Trademark