Lidhja Demokratike e Kosovës ka reaguar pas deklaratës së Ramush Haradinajt i cili tha se Isa Mustafa e ka shndërruar Kosovën në poligon të krimit e korrupsionit.

LDK ka kërkuar nga Haradinaj që të tërhiqet nga shpifjet dhe akuzat, pasi siç thotë LDK, ai është njeriu i fundit që mund t’i shes moral Kosovës.

“LDK-ja i bën të qartë zotit Haradinaj se ai është njeriu i fundit që mund t’i shes moral në këto aspekte kujtdo në Kosovë, e aq më pak LDK-së”, thuhet në reagimin e LDK-së.

LDK po ashtu kërkon nga kreu i AAK-së që të sqarojë prejardhjen e të ardhurave të tij të mëdha.

“Paraprakisht, zoti Haradinaj duhet të sqaroj prejardhjen e pasurisë së tij marramendëse, apo së paku aferën e fundit të privatizimit të qindra hektarëve tokë nëpër Kosovë”, shkruhet në komunikatën e lëshuar për medie nga LDK.

Partia ku Mustafa është lider i ka bërë thirrje Haradinajt që të tërhiqet nga shpifjet dhe akuzat, “gjuhë të cilën siç duket e ka mësuar së fundi gjatë partneritetit me grupet radikale të majta në kuadër të ‘koalicionit të molotoVëVe”. /Insajderi.com