Real Madrid ka nisur të ndërtojë të ardhmen dhe një nga prioritetet kryesore në planifikimin për sezonin e ardhshëm është përforcimi i mesfushës.
Me largimin e afërt të Luka Modric, drejtuesit sportivë të “Los Blancos” janë në kërkim të një dirigjenti të ri në qendër të fushës, dhe emri që ka dalë në pah është ai i Tijjani Reijnders, mesfushori aktual i Milanit.
Megjithatë, Reali nuk është i vetëm në këtë garë. Manchester City ka lëvizur me shpejtësi dhe ka nisur bisedime formale me skuadrën italiane për të siguruar shërbimet e mesfushorit holandez. Sipas raportimeve nga Tuttomercato, shifra e transferimit mund të arrijë deri në 60 milionë euro, një shumë që mund ta bindë Milanin të heqë dorë nga një prej lojtarëve më në formë të sezonit.
Pep Guardiola e sheh Reijnders si pasuesin ideal të Kevin De Bruyne dhe synon të veprojë shpejt për të lënë pas rivalët nga Madridi. Nga ana tjetër, bordi i Real Madridit është i vetëdijshëm për interesimin e fuqishëm të City-t dhe nuk dëshiron të humbasë një lojtar që do t’i përshtatej në mënyrë të përkryer stilit të lojës që Xabi Alonso pritet të zbatojë në “Santiago Bernabéu”.
Kontrata e Reijnders me Milanin është e vlefshme deri në vitin 2030, ndërsa vlera e tij në treg vlerësohet rreth 50 milionë euro – duke përgatitur terrenin për një duel të fortë mes dy gjigantëve të futbollit evropian. Vera e ardhshme do të jetë vendimtare për të përcaktuar destinacionin final të mesfushorit holandez.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
