Akterë të Bankës Qëndrore të Kosovës (BQK) janë takuar me një sërë institucionesh të sigurisë e të financave me qëllim që të diskutohet për ngritjen e luftimit të parave të falsifikuara.

BQK-ja, me anë të një komunikate për media, ka rekomanduar qytetarët që të paguajnë më shumë me kartelën e tyre bankare dhe të shmangin pagesat me para të gatshme, si formë e luftimit të dy euroshes falso që po qarkullon me të madhe në Kosovë, shkruan Gazeta Insajderi.

“Po ashtu, me theks të veçantë udhëzohen qytetarët të shmangin përdorimin e parave të gatshme (veçanërisht monedhën 2 euro) dhe të shfrytëzojnë sa më shumë kartelat bankare gjatë pagesave”, thuhet në njoftimin e BQK-së.

Tutje, BQK-ja rekomandon që bizneset të furnizohen vetëm nga bankat me para të gatshme, kurse mjetet e pranuara t’i nënshtrohen verifikimit para se të rivihen në qarkullim.

Veprime konkrete u kërkuanedhe nga bankat dhe institucionet tjera financiare, që të ngirsin kapacitetet e brendshme të adresimit të kësaj dukurie dhe komunikimit sa më efikas me autoritetet përkatëse.

“Në fund të takimit, palët u dakorduan që përmes grupit punues ndërinstitucional, të koordinohen aktivitetet sipas fushëveprimit përkatës të institucioneve, të rekomandojnë ndryshimet legjislative dhe monitorojnë në vazhdimësi zbatimin e këtij plani”, thuhet ndër të tjera në njoftimin e BQK-së. /Insajderi.org/