Banorët e Mus-it në lindje të Turqisë, bëjnë vizita të shpeshta në liqenin Hamurpet (Akdogan) prej ku nën sipërfaqen e akullit nxjerrin peshq dhe në këtë mënyrë fitojnë të ardhurat e tyre, raporton Anadolu Agency (AA).

Temperaturat tejet të ulëta kanë shkaktuar ngrirjen e pjesshme të shumë liqeve dhe lumenjve, andaj peshkatarët doemos duhet që akullin ta prejnë me motosharrë.

Liqeni ndodhet në 2.149 metra lartësi mbidetare, ndërsa banorët e vizitojnë krahas motit ekstrem të ftohtë.

Mbulesa e akullit arrin deri në 30 centimetra, andaj nevojitet motosharrë për të prerë shtresën e akullt dhe të lëshohet rrjeti prej të cilës ditëve në vijim do të nxirren peshqit.

Peshkatari Ferhat Basaran thotë se pas punës së vështirë në sipërfaqen e liqenit, hedhin rrjetin dhe gjuajnë peshqit.

“Bukën e nxjerrim nga nën akulli. Punojmë në kushte të vështira, apo ashtu mbijetojmë. Çdo mëngjes thyejmë shtresën e akullit prej 30 centimetra, pastaj hedhim rrjetin. Të nesërmen vijmë dhe e nxjerrim”, tha Basaran duke shtuar se një kilogram peshk e shesin nga gjashtë lira (rreth 1.6 euro).

Puna në kushte të tilla është e rrezikshme dhe për këtë peshkatarët janë të vetëdijshëm, por thonë se nuk kanë zgjidhje tjetër, sepse në këtë mënyrë ushqejnë familjen.