Dogana e Kosovës është duke e zhvilluar një aksion për konfiskimin e alkoolit në fshatin Hoçë e Madhe të Rahovecit.

Por këtë aksion e kanë penguar disa qytetarë, të cilët sipas burimeve të Insajderit janë serbë. Banorët e këtij fshati janë mbledhur pranë vendit ku pritet të bëhet konfiskimi i alkoolit.

Nga Dogana e Kosovës kanë thënë për Insajderin se gjatë procesit të tërheqjes kanë hasur në rezistencë.

“Procesi i tërheqjes është duke vazhduar kemi pasur rezistecë, por, nuk ka ndikuar në procesin e tërheqjes”, ka thënë Adriatik Stavileci, Zëdhënës i Doganës.

Rastin e ka konfirmuar edhe zëdhënësi i Policisë për rajonin e Gjakovës, Sheremet Elezaj.

“Po është duke vazhdu ai aksion, Dogana ka kërkuar asistim për tërheqjen e disa litrave alkool, edhe ai njoftimi i më hershëm, po vazhdon tërheqjen e materialit. Policia po vazhdon me i asistu doganierët. Vazhdimisht qytetarët mblidhen, por për detaje të tjera do të dalim më komunikatë”, tha Shermet Elezaj për Insajderin.

Dogana e Kosovës ka bërë të ditur se dje ka sekuestruar 42 mijë litra pije alkoolike tek një dyqan ku shiten pije alkoolike në fshatin Hoçë e Madhe të Rahovecit.