Partia Demokratike e Kosovës ka kërkuar nga Qeveria Kurti që të vlerësojë situatën në veri dhe veprimet t’i ndërmarr në bashkëpunim me aleatët ndërkombëtarë.

Përmes një komunikate, PDK-ja ka dënuar tendencën për dhunë nga grupet e dirigjuara nga Serbia.

“Partia Demokratike e Kosovës shpreh shqetësim të thellë për tensionet e sotme në komunat e pjesës veriore të Kosovës, duke dënuar tendencën për dhunë nga grupe të dirigjuara nga Serbia. Ftojmë qeverinë që ta vlerësojë situatën e sigurisë dhe veprimet t’i ndërmarrë në koordinim edhe me partnerët ndërkombëtarë”, thuhet në reagimin e partisë më të madhe opozitare.

Tutej, PDK-së thotë se përshkallëzimi i situatës nuk i sjell asnjë dobi Kosovës.

“Në këtë moment, të vetëdijshëm se përshkallëzimi i situatës nuk i sjellë asnjë dobi Kosovës, bëjmë thirrje për përmbajtje, rend dhe qetësi, për t’i lënë hapësirë respektimit dhe zbatimit të vullnetit të qytetarëve”, thuhet në reagim.