Një avion i një linje të brendshme në Libi i nisur nga qyteti Sebha me destinacion Tripolin, u mor peng nga dy persona dhe u detyrua që të ulet në një aeroport të Maltës.

Në bordin e avionit besohet se janë të paktën 118 persona. Ka raportime se mes pasagjerëve ndodhen edhe disa përfaqësues të Asamblesë Kombëtare të Libisë, organ legjislativ i ngritur pas rrëzimit të Muamar Gaddafit.

Autorët e pengmarrjes mësohet se janë dy persona mbështetës të Gaddafit, të cilët të armatosur me granata dore kanë bërë thirrje për lirimin Saif al Islam, djali i ish-kolonelit të rrëzuar me armë.

Pengmarrësit kanë kërcënuar se do të hedhin në erë mjetin nëse nuk u plotësohen kërkesat e tyre. Por fati i Saif al Islam mbetet një mister. Djali i Gaddafit u raportua se është liruar nga burgu në muajin korrik, por ende nuk ka asnjë të dhënë për të.

Ndërkohë, forca të shumta të sigurisë malteze kanë bërë rrethimin e mjetit fluturues dhe po përpiqen që të vendosin kontakte me pengmarrësit.