Sot po prezantohet projekti i Portit të ri Tregtar të Durrësit në Porto Romano.

Zv/kryeministrja dhe ministrja e Infrastrukturës dhe Energjisë, Belinda Balluku ka deklaruar se projekti do të hidhet në garë ndërkombëtare fillimvitin e ardhshëm dhe do të nisë zbatimin me çeljen e kantierit të Porto Romanos brenda vitit 2023.

“Duhet pasur parasysh që përveç këtij prezantimi zyrtar sot, i cili padyshim do të ketë edhe elementë  të shumtë teknikë ne do të bënim një ftesë për të gjithë trupin diplomatik që në javët në vijim, para fundit të janarit ku do të jetë edhe momenti i lançimit të garës ndërkombëtare, mund të kishim një sesion të hapur me të gjitha kompanitë e interesuara, me prezencën e autoritetit Portual të Durrësit, Ministrisë së Infrastrukturës dhe energjisë dhe padyshim “Royal Haskoning” për t’u dhënë atyre një pamje më të qartë teknike dhe financiare se si ne mendojmë ta zhvillojmë këtë projekt dhe për t’i përgatitur kështu në mënyrë transparente dhe të barabartë për garën që do të hapim në fund të Janarit të 2023-shit”, tha ajo.

Sipas ministres Balluku, për ta bërë realitet këtë dimension rajonal duhet punë më shumë dhe siguri logjistike e eficencë e transporteve të mallrave mes vendeve.

“Vetëm në këtë mënyrë do të mund të sigurojmë qëndrueshmëri ekonomike për qytetarët tanë dhe të bëhemi vende me kontribut të qenësishëm dhe të rëndësishëm për BE”, u shpreh zv/kryeministrja dhe ministrja e Infrastrukturës dhe Energjisë, Belinda Balluku.

Nga ky investim 390 milion eurosh sipas Ballukut pritet të punësohen 1500 persona.

“Është një projekt strategjik që do mbulojë nevojat e Shqipërisë, Maqedonisë së Veriut dhe të Kosovës, për 4 dekadat e ardhshme. Nuk është kopje e madhe e Durrësit, por investim i ri modern që do mbulojë kërkesat e 4 dekadave të ardhshme me një teknologji që nuk është aplikuar këtu”.

“Në këtë investim 390 milion eurosh që punëson 1500 vetë, një vëmendje ka marrë ndërlidhja e terminaleve edhe hekurodhore. Dy portet do lidhen sëbashku por edhe më linjat që vjen për në Tiranë. 46% do mundësohet nga shteti 54% nga ndërtuesi. Pasi kjo është zgjedhur me konsensus. Do rimbursohet na autoriteti portual i Durrësi. Do dali në garë ndërkombëtare, për të gjitha kompanitë. Procesi i garës do mbyllet në korrik të 2023”, tha Balluku.