Komuna e Përparim Ramës e ka shpërblyer me tender mbi gjysmë milion euro kompaninë “Gërlica-Company”, pavarësisht se pronari i saj ishte i dënuar për dokumente të falsifikuara, dhe sipas Ligjit të Prokurimit nuk mund të marrë kontrata publike. Ndërmarrja ferizajase e ka shkelur prapë ligjin, kur në dosjen e kontratës e ka fshehur aktgjykimin e dënimit me burgim të drejtuesit të saj, vepër kjo e dënueshme me ligjet në fuqi.
Kryetari i Prishtinës, Përparim Rama, të enjten në mesditë ishte nisur për të rruga “Nekibe Kelmendi”, ku tashmë kanë nisur punimet për rregullimin e saj.
Deri atje kishte shkuar për të monitoruar ndërtimin e udhës që çon për te “Pallati i Drejtësisë”.
Rama në vendpunishte u fliste punëtorëve që tashmë po kryenin punët e para, i veshur me jelekun sikur të tyre, teksa shihej i qeshur derisa bashkëbisedonte me ta, shkruan Gazeta Insajderi.
Përpos punëtorëve, i pari i Prishtinës nuk dihet nëse aty i takoi edhe drejtuesit e “Gërlica-Company” SH.P.K., që sipas Agjencisë së Regjistrimit të Bizneseve janë: Genc Thaçi, Ahmet Vogliqi dhe Mifail Vogliqi.
I fundit që është pronar/aksionar në kompaninë me bazë në Babush të Ferizajt, ka arritur ta fitojë tenderin mbi gjysmë milion euro, pavarësisht se është i dënuar me burgim për keqpërdorim dhe mashtrim me prokurimin publik, zbulon Gazeta Insajderi.
Sipas nenit 65 paragrafit 3 të Ligjit për Prokurim Publik: Operatori Ekonomik nuk ka të drejt të marrë pjesë në një aktivitet të prokurimit ose në ekzekutimin e ndonjë kontrate publike nëse operatori i tillë ekonomik, ndonjë drejtues, menaxher ose drejtor i saj gjatë dhjetë viteve të kaluara është shpallur fajtor nga një gjykatë kompetente për kryerjen e ndonjë vepre penale ose civile duke përfshirë praktikat e korrupsionit, larjen e parave, dhënien e mitos, avantazheve ose aktiviteteve të ngjashme.
Por, ky fakt se ka penguar zyrën e Prokurimit të Përparim Ramës që me 3 gusht, ta lejojë nënshkrimin e kontratës me titull: Ndërtimi i rrugës Nekibe Kelmendi P 45 deri P-13.
Gazeta Insajderi për këtë çështje ka kërkuar përgjigje nga kryetari Përparim Rama, nënkryetari Alban Zogaj, departamenti i Prokurimit dhe ai i Komunikimit, por që nga e premtja nuk ka marrë asnjë përgjigje.
Kërkohen hetime kundër “Gërlica-Company” për ‘keqpërdorim dhe mashtrim me prokurimin publik’
Të premten, më 16 shtator, Kryeprokurori i Prokurorisë Themelore të Prishtinës, Kujtim Munishi, e ka pranuar një kërkesë për inicim të hetimeve kundër kompanisë ferizajase.
Kjo për faktin se Albion Vogliqi, përfaqësuesi i autorizuar nga Mifail Vogliqi, pronari i “Gërlica-Company”, ka nënshkruar deklaratën nën betim duke mos e njoftuar komunën e Prishtinës, se shefi i i tij ishte shpallur fajtor për mashtrim të shtetit.
Kështu i bie se i autorizuari Vogliqi e ka mashtruar komunën e Prishtinës dhe e ka shkulur Ligjin e Prokurimit Publik kur nuk ka treguar për dënimin e pronarit të kompanisë.
Operatori Ekonomik, në këtë rast “Gërlica-Company” ka paraqitur dokumente te rreme tek Autoriteti Kontraktuese, komuna e Prishtinës.
Gazeta Insajderi e ka pyetur kompaninë pse në dosjen e tenderit nuk e ka paraqitur dokumentin e aktgjykimit të Vogliqit, por “Gërlica-Company” ende nuk ka kthyer përgjigje.
Derisa as Prokuroria Themelore e Prishtinës, ende nuk ka treguar nëse ka nisur hetimet ndaj ndërmarrjes në fjalë, pronari i së cilës pos që ka qenë i dënuar për mashtrim të shtetit, e ka mashtruar sërish atë.
Ndryshe, shkresën për inicim të hetimeve nga AVONET, Rrjeti i Organizatave Joqeveritare, e ka pranuar edhe kryetari i Prishtinës, Përparim Rama, si dhe disa komponentë të tjerë, por asnjëra palë ende nuk ka kthyer përgjigje në pyetjet e Gazetës Insajderi.
Për çka saktësisht është dënuar Mifail Vogliqi?
Më 2 gusht 2021, Gjykata Themelore në Gjilan e kishte shpallur fajtor, Mifail Vogliqin dhe e kishte dënuar me burgim.
Sipas aktgjykimit të cilin e ka Gazeta Insajderi, ai ishte dënuar me 180 ditë burgim, ose gjashtë muaj vuajte të dënimit, të cilin më pas e ka paguar me gjobë.
Kjo për shkak se Vogliqi kishte kryer veprën penale “keqpërdorim dhe mashtrim me prokurimin publik, shkruan Gazeta Insajderi.
Sipas vendimit të Gjykatës, “Vogliqi në cilësinë e pronarit të “Gërlica-Company” me vetëdije të plotë ka shkelur rregullat e Ligjit të Prokurimit Publik, me qëllim të mashtrimit në procedurat e prokurimit publik dhe ndikimit tek autoriteti kontraktues”.
Konkretisht Vogliqi ka paraqitur dokumente të rreme, përkatësisht pa autorizimin e A. K., inxhinier i komunikacionit dhe të A.D., inxhinier i ndërtimtarisë, me të cilët kompania e tij nuk ka pasur kurrfarë para kontrate ose kontrate të punës, ka përdorur të dhënat e tyre personale.
Siç janë përgatitjet e tyre profesionale për të plotësuar kriterin e dosjes së tenderit të shpallur nga komuna e Vitisë më 1 tetor 2020, lidhur me projektin e “ndërtimi i rrugës Viti-Kërbliq-Kaçanik, faza e dytë”.
Tenderët tjerë problematikë të komunës së Prishtinës
“…kam me punu derisa ta bëjmë transformimin të cilin ju kam premtu, do të bëhet, do ta bëj Prishtinën me karakter unik në botë”, ky ishte premtimi që entuziazmoi masën kur Përparim Rama shpalli fitoren në zgjedhjet komunale të vjeshtës së 2021.
Por, kaq muaj prej zgjedhjes së tij kryetar te shpenzimi i parasë publike nuk vërehet asgjë unike. Në shumicën e rasteve ka aplikuar metodën e tenderëve të negociuar, një veprim i zakonshëm për autoritetet komunale kosovare e ballkanike.
Këto veprime bien në kundërshtim me premtimet e sjelljes së frymës londineze në Prishtine, të premtuar nga kryetari Rama, shkruan Gazeta Insajderi.
Ngjashëm pati ndodh edhe më 12 korrik 2022. Komuna e Prishtinës vendosi që të shmanget nga procedurat e hapura konkurruese në dy lote të një tenderi për sigurimin fizik. Përdori procedurën e negociuar.
Tre ditë më pas, më 15 korrik – kontrata për sigurimin fizik të objekteve të Komunës së Prishtinës dhe objekteve te QKMF dhe QMU-se, iu dha dy kompanive.
Me Lotin e parë është shpërbly Delta Security SH.P.K., i cili peshon 399 mijë e 531,82 euro, derisa të dytin e fitoi Security Code, dhe kap shumën e 264 mijë e 435 eurove, shkruan Gazeta Insajderi.
Komuna e Prishtinës vendosi t’i shpërblejë këto dy kompani të sigurimit me kontratë për shërbimet e sigurimit fizik, pa njoftim për kontratë – do të thotë në mënyrë të negociuar, duke anashkaluar kompanitë e tjera të sigurimit që operojnë në Republikën e Kosovës.
Kështu Zyra e Prokurimit të Ramës e ka shkelur Ligjin për Prokurimin Publik i cili thotë se “autoriteti kontraktues nuk do të ekzekutojë asnjë aspekt të aktivitetit të prokurimit në një mënyrë që redukton apo eliminon konkurrencën në mes të operatorëve ekonomikë ose që diskriminon në dëm ose në të mirë të një ose më shume operatorëve ekonomikë”.
Në maj, Rama e shpalli fitues të tenderit të akuzuarin për prostitucion
Në maj të këtij viti, kryetari i ri i Prishtinës, Përparim Rama, kishte përjashtuar nga procedurat tenderuese kompanitë e sigurimit fizikë, duke i ka dhënë tender një burimor kompanisë “Roja e Nderit”, pronë e Kushtrim Krasniqit.
Krasniqi ishte arrestuar në prill të këtij viti, nën dyshimet se është i përfshirë në prostitucion.
Ky tender i Komunës së Prishtinës, peshonte në vlerën 84 mijë euro. Ndërsa Rama shpërbleu kompaninë e të arrestuarit për prostitucion përmes procedurës të negociuar, pa publikim të njoftimit për kontratë, shkruan Gazeta Insajderi.
“Roja e Nderit” u rekomanduan nga Rama për kontratë më datën 16 maj. Ndërkaq dy ditë pas u nënshkrua kontrata.
Kjo kompani për një periudhë dy mujore do ta bëjë sigurinë fizike të të gjitha objekteve komunale të kryeqytetit.
Edhe 100 ditëshi i Ramës përshkohej me tenderë negocioues
Nga janari kur Rama e mori detyrën, deri në mars kur i bëri 100 ditë punë, ai nënshkroi 20 tenderë, vlera e përgjithshme e të cilëve ishte afro 1.5 milionë euro.
Në dhënien e disa prej tyre u ndoqën procedurat e hapura, derisa të tjerët u përshkaun me procedura të negociuara – pa publikim të njoftimit për kontratë.
Mbi 252 mijë euro i ndau për terrenet e reja sportive në kryeqytet. Ato do t`i ndërtojë konsorciumi “Thesar” & “TINI”.
52 mijë sosh u ndan edhe për rregullimin e fushave rekreative, të cilat veçse ekzistojnë. Puna për këtë iu besua kompanisë “MBB Construction”.
Për rikonstruimin e rrugës “Ilir Konushevcit”, i dha një kontratë mbi 226 mijë euroshe operatorëve ekonomikë “Eskavatori” dhe “Best Company”.
Kryetari, që la Londrën për Prishtinën, mendoi edhe për shtigjet e vrapimit e ecjes. Për një të tillë dhuroi mbi 10 mijë euro. Paratë u dhanë përmes një tenderi që ishte me procedurë të negociuar – pa publikim të njoftimit për kontratë.
Tjerat kontrata që u nënshkruan kapin shifra më të vogla.
8 mijë e 350 euro për renovimin e shtëpisë së djegur në Lebanë. 4 mijë e 487 për meremetet në bibliotekën “Hivzi Sylejmani” e 990 për ato te objekti i zjarrfikësve.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2024 Gazeta Online Insajderi - Të gjitha të drejtat e rezervuara.
