Prokuroria Themelore e Prishtinës ka nisur hetimet për skandalin e kompanisë “Jumbo” me ish- punëtoren e cila u largua nga puna dy ditë pas lindjes së fëmijës.

Kompania me qarkullim multimilionësh të oligarkëve Samir Mane e Arsim Papraniku i kishin bërë presion brutal ish-punëtorës Albenita Zogaj që të nenshkruaj dorëheqjen dy ditë pasi kishte lindur në mënyrë që firma të mos ia paguante rrogën e lehonisë.

Zëdhënësja e Prokurorisë në Prishtinë, Laureta Ulaj ka konfirmuar për Gazetën Insajderi se rasti është duke u trajtuar nga prokuroria pas parashtresës së dërguar nga Kryeprokurori i Shtetit.

“Ju njoftojmë se Prokuroria Themelore në Prishtinë ka pranuar parashtresë nga Zyra e Kryeprokurorit të Shtetit për çështjen në fjalë. E njëjta është regjistruar si rast në këtë prokurori dhe është duke u trajtuar nga ana e prokurorit përkatës” thuhet në përgjigjen e prokurorisë.

Ish- punëtorja e Jumbo, Albenita Zogaj kishte përjetuar tmerrin nga ish eprorët e saj të cilët i kishin bërë presion për tri orë rresht në një nga magazinat e kompanisë që të nënshkruaj dorëheqjen vullnetarisht.

Zogaj nga frika prej presionit se do ta dërgonin në burg dhe nuk do ta shihte më fëmijën e saj që e kishte lindur para dy ditëve, kishte nënshkruar çdo dokument që iu kishte ofruar nga ish-shefat që i bërtisnin tërë kohën.

Presioni brutal- “Nëse nuk i nënshkruan, ti nuk i shehë fëmijët e tu për 7 vjet”

Kompania “Jumbo”, është në pronësi të dy oligarkëve. Samir Manes e Arsim Papranikut. Mane promovon publikisht krijimin e një ambienti të dinjitetshëm të punës për punëmarrësit, ndërsa oligarku Papraniku është respektuar lartë nga institucionet e Kosovës.

Papraniku është nderuar me titullin Konsull Nderi i Kosovës në Republikën e Maqedonisë. Titulli i është dhënë nga ish-kryeministri Haradinaj. Nuk ka ndonjë njoftim zyrtar që Qeveria Kurti ia ka hequr oligarkut Papraniku këtë titull.

Por, sa po i respektojnë punëtorët kosovar dy biznesmenët që janë nderuar nga shteti i Kosovës?

Rrëfimi i ish-punëtorës së tyre, Albenita Zogaj, dëshmon se është duke ndodhur e kundërta. Kompanitë e tyre janë duke i terrorizuar punëtorët.

Zogaj ka dëshmuar në një intervistë për “Betimi për Drejtësi”, se ish-shefat e saj në “Jumbo”, kanë bërë çmos që asaj të mos i paguhej pushimi i lehonisë që i takon me ligj. Kanë shkuar deri në mbajtjen peng për disa orë rresht në një magazinë të “Jumbo”.

Zogaj ishte punësuar para pesë viteve në këtë kompani. Njëherë si arkatare. Më pas u avancua në mbikëqyrëse të arkave.

Por, problemet me firmën “Jumbo”, i ishin shfaqur për shkak të shtatzënisë së saj. Kishte punuar në firmë deri 5 ditë para lindjës.

Kishte lindur fëmijën me datën 6 nëntor 2023.

Ishte këshilluar nga gjinekologia që për 10 ditë duhet të qëndroj e shtrirë dhe nuk guxon të rrijë as ulur e as në këmbë.

Ky rekomandim i mjekës nuk i kishte bërë përshtypje ish-shefave të saj. Vetëm dy ditë pas lindjes e kishin ftuar që vinte në zyrë në Prishtinë.

Ishte detyruar që ta linte foshnjën te një familjar dhe t’i përgjigjej urdhrit të ish-shefave.

“Më kanë akuzu se e kam keqpërdor detyrën. Më kanë thënë që “ne kemi bisedu me policinë dhe nëse ti nuk i nënshkruan dokumentet që ne kemi me ti dhënë, ti nuk i sheh fëmijët e tu për shtatë vjet”, ka rrëfyer Zogaj për “Betimi për Drejtësi”.

“Në këtë moment më kanë thënë që vjen policia edhe nuk e sheh më kërkon. Kam kërku me dalë, nuk më kanë lanë. Është një far magazine në katin e dytë, me një nga punëtorët aty më kanë çu në magazinë dhe më kanë mbajt për 3 orë. As nuk kam pas të drejtë telefonin, as nuk janë shqetësu për gjendjen tem, asnjë send”, pohoi Zogaj.

Ish-shefat e saj kishin bërë gati dokumentet se ku theksohej se Zogaj po jep dorëheqje me vetedëshirë.

Ndonëse e frikësuan me akuzat për vjedhje me qëllim që ta bindin që të jepte dorëheqje nga frika, menaxhmenti i “Jumbo”, asnjëherë nuk e denoncoi Zogajn në polici për vjedhje.

Inspektoriati i Punës gjobitë kompaninë e Manes e Papranikut

Zogaj më pas kishte vendosur që të ankohej të institucionet. Te Inspektoriati i Punës. Ky organ i kishte shqiptuar kompanisë “Kid Zone Kosova”, me emrin tregtar “Jumbo”, një gjobë prej 2 mijë eurosh.

Gjoba prej 2 mijë eurosh dëshmon se kompania Jumbo kishte larguar padrejtësisht nga puna Zogajn, me qëllim që të shmangte pagesës e pushimit të lehonisë.

Fillimisht, Inspektoriati Qëndror i Punës kishte kërkuar nga “Jumbo”, që ta respektonte Ligjin e Punës. Ia kishte rikujtuar se është e kundërligjshme që t’i shkëputet lehonës marrëdhënia e punës.

Kërkesën ia kishte bërë me datën 14 dhjetor të vitit të kaluar. Shefat e Jumbos kishin shpërfillur kërkesën e Inspektoriatit për ta respektuar ligjin duke e kthyer në punë ish-punëtorën Zogaj.

Disa ditë më vonë, më 26 dhjetor të vitit të kaluar, Inspektoriati i Punës kishte shqiptuar gjobë ndaj firmës “Jumbo”, meqe nuk kishte dhënë indikacione se është e interesuar që ta respektoj Ligjin e Punës.