Agjencia për Parandalimin e Korrupsionit (APK) ka bërë të ditur se prokurori Metush Biraj, të cilit iu është ngritur aktakuzë për ryshfet, është duke iu nënshtruar verifikimit të pasurisë për vitin 2023.

“I njëjti subjekt deklarues është duke ju nënshtruar verifikimit edhe sipas shortit të vitit 2023”, thuhet në përgjigjen e APK-së për Betimin për Drejtësi.

“Subjekti deklarues z. Metush Biraj ka qenë pjesë e zyrtarëve publik që u është bërë verifikimi i pasurisë në vitin 2019. Pas përfundimit të kontrollit të plotë, rast është mbyllur në vitin 2019. I njejti subjekt deklarues është duke ju nënshtruar verifikimit edhe sipas shortit të vitit 2023”, thuhet tutje.

Prokuroria Themelore në Gjilan ka ngritur aktakuzë ndaj Metush Birajt, për veprën penale “Marrja e ryshfetit” dhe “Dhënia e Ryshfetit” ndaj të pandehurve Shkodran Pulaj dhe Naim Osmanit.

Sipas aktakuzës, kishte pranuar 20 mijë euro të heq dorë nga ndjekja penale ndaj narokdilerit Osmani, Ukë Sadrijajt dhe Arbër Salihut në mungesë provash. Që të tre dyshoheshin për shitje të substancave narkotike, shkruan Gazeta Insajderi.

“Sipas aktakuzës, i pandehuri M.B., në mes të muajve prill dhe korrik të vitit 2023, në Prizren, në cilësi të prokurorit të shtetit të Prokurorisë Themelore në Prizren, pranon ofertën ose premtimin për dhuratë, në shumë prej 20.000 €, në atë mënyrë që gjatë përfaqësimit në Gjykatën Themelore në Prizren, më 31.03.2023, në këmbim të premtimit heq dorë nga ndjekja penale në mungesë të provave ndaj të akuzuarve: N.O., U.S. dhe A.S., për shkak të veprës penale ‘’Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge’’, të KPRK-së”, thuhet në njoftimin e Prokurorisë.

Në anën tjetër, prokurori Biraj po ashtu akuzohet për pazarllëqe edhe me narkodilerin tjetër nga Prizreni, Shkodran Pulajn.

“Ndërsa, të pandehurit Sh.P. dhe N.O., me dashje dhe në mënyrë të drejtpërdrejtë kanë premtuar dhënien e ryshfetit për personin tjetër – tani të pandehurin M.B., me qëllim që i njëjti, në cilësinë e prokurorit të shtetit, në përfundim të shqyrtimit gjyqësor te datës 31.03.2023, të heq dorë nga aktakuza kundër të akuzuarve N.O., U.S. dhe A.S., për shkak të veprës të sipërshënuar penale”.