Një tjetër punonjës policie ka mbetur i plagosur në ditën e katërt të protestave për vrasjen e 25-vjeçarit Klodian Rasha, nga një efektiv i “Shqiponjave”.

Përmes një njoftimi zyrtar mësohet se rreth orës 19:30, te Drejtoria Vendore e Policisë Tiranë, si pasojë e gurëve dhe kapsollave të hedhura në drejtim të punonjësve të policisë nga turma e protestuesve është dëmtuar në pjesën e syrit nga një kapsollë një Specialist për Hetimin e Krimit në Komisariatin Nr.1.

Mësohet se i plagosuri u transportua menjëherë për ndihmë mjekësore në spitalin “Nënë Tereza”.

Ju kujtojmë se në ditën e parë të protestave mbeti i dëmtuar rëndë në sy një tjetër efektiv, Fadil Allaraj.