Qindra njerëz të mbledhur sot në qendër të Beogradit, mbështetës të organizatave të ekstremit të djathtë në Serbi, kanë protestuar sot kundër ligjit për Trepçën, të miratuar disa ditë më parë në Kuvendin e Republikës së Kosovës, raporton Gazeta serbe Blic.

Protestuesit mbanin në duar transparente ku shkruhej “Ne nuk e japim Trepçën, ne nuk e japim Kosovën”, ndërsa politikanët që iu adresuan masës kanë kritikuar kryeministrin serb, Aleksandar Vuçiq.

Ata kritikuan marrëveshjet që Vuçiq ka arritur me qeverinë e Kosovës në Bruksel.

Pjesë e organizimit ishte edhe lëvizja e ekstremit të djathtë, Obraz, e cila është parti e ndaluar në Serbi, për shkak të aktiviteteve të dhunshme të bëra në të kaluarën dhe ideologjisë së tyre që sipas kushtetutës së Serbisë, bie ndesh me rregullorën e Organizatës për të Drejtat e Njeriut. /Insajderi.com