Nëse keni pyetur ndonjëherë veten se cila gjatësi flokësh do t’ju përshtatej më mirë, do ta besonit se matematika mund t’ju ndihmojë?!

Në fakt, disa parukierë betohen për rregullin e 5.5cm – një formulë matematikore që, sipas tyre, mund të ndihmojë për të llogaritur prerjen optimale për formën e fytyrës tuaj.

Natyrisht, stili personal ka rëndësinë e vet – nuk do të lejojmë që një formulë matematikore të na pengojë në zgjedhjen e shijes sonë, kështu që nëse tashmë ke gjetur një prerje që të pëlqen, mund ta anashkalosh këtë llogaritje.

Por, nëse gjithmonë ke dashur të provosh një prerje të shkurtër, por ke frikë se nuk do të të përshtatet, ose gjithmonë ke mbajtur flokët të shkurtër, por tani je në humor për të ndryshuar stilin, kjo formulë mund të ndihmojë.

Si funksionon rregulli i 5.5cm?

Ata që nuk janë të shkëlqyer në këndet dhe numrat mund t’i marrin frymë lehtësisht – nuk keni nevojë për një mësim matematike për këtë dhe nuk duhet të shkoni në sallon për ta provuar.

Sipas ekspertëve gjatësia optimale e flokëve varet nga këndi i nofullës. Formula përdor një raport që analizon gjatësinë mes mjekrës dhe llapës së veshit për të përcaktuar nëse flokët e gjatë apo të shkurtër do të të përshtateshin më mirë.

Nëse distanca që matet është më pak se 5.5cm, një prerje e shkurtër të përshtatet. Nëse është më shumë se 5.5cm, flokët e gjatë (teorikisht) do të të shkojnë më shumë. Mund ta zbulosh lehtë në shtëpi.

Gjithçka që të duhet është një vizore, një laps dhe një pasqyrë.

Si të matësh saktësisht rregullin e 5.5cm:

Së pari, qëndro përpara pasqyrës.

Merr lapsin dhe vendose horizontalisht poshtë mjekrës.

Tani vizorja hyn në lojë: vendose atë në një kënd të drejtë me lapsin dhe shtyje deri në nivelin e llapës së veshit.

Mat distancën nga llapa e veshit deri tek mjekra vertikalisht poshtë.

A ka përjashtime nga rregulli i 5.5cm?

Sigurisht, një formulë matematikore nuk është gjithçka për të vendosur se cilën prerje flokësh duhet të zgjedhësh, por ndoshta do të ndihmojë për të marrë një vendim. Përveç kësaj, forma e fytyrës ose struktura e flokëve mund të luajnë gjithashtu një rol të rëndësishëm në përcaktimin e prerjes më të mirë për ty – për shembull, ata me flokë shumë të hollë mund të preferojnë një prerje të shkurtër për të dhënë një pamje më të plotë. (Në fund të fundit, varet nga preferenca jote.)

Ne gjithmonë rekomandojmë që të bisedosh me parukieren tënde dhe të provosh stile të ndryshme për të gjetur atë që funksionon për ty, pavarësisht se çfarë ka treguar vizorja.