Më pak se 10% e prindërve që kanë fëmijët nxënës të shkollës fillore kanë aplikuar për subvencionim të teksteve shkollore, dy ditë pas hapjes së afatit.

Ndonëse kanë mbetur edhe 4 ditë, para se të nisë procesi mësimor, sipas të dhënave të ministrisë së Arsimit, të publikuara mbrëmjen e së shtunës, janë rreth 33 mijë aplikime në platformën “E-Kosova”.

Kjo shifër po vlerësohet e ulët nga njohësit e arsimit, meqë sipas të dhënave, rreth 300 mijë familje do të duhet t’i pajisin fëmijët e tyre vet me libra.

Rinor Qahaja nga Instituti “Ed Guard” thotë se institucionet do të duhej të merrshin më shumë me vetëdijesimin e prindërve për të aplikuar në këtë platformë.

“Ajo çka të gjithë jemi të vetëdijshëm, për bindjen time dhe nga ana e qeverisë është që ky proces është i vonuar, pa dyshim që po, kush do të jetë efekti i tij kjo ngelet të shihet nga shtatori e tutje, mirëpo një përkrahje më e madhe në vetëdijësim më të rritur në përdorim të platformës, pa dyshim se do ishte e mirëseardhur për prindërit së pari, të rikujtojm që jo të gjithë janë të përshtatshëm në platforma onnline”, ka thënë Rinor Qehaja.

Ndërsa ish-zëvendësministri i Arsimit, Azem Guri thotë se ky do të jetë vetëm një nga problemet që do të shfaqen ditëve në vijim.

“Ajo që është më kryesore për tu theksuar e para nuk kanë vepruar sic i obligon ligji për shkollimin parauniversitar në Republikën e Kosovës, që do të thot me ligj këto duhet të i ndjekin edhe procedurat e prokurimi, mashti është e obliguar që të bëjë pagesën e teksteve shkollore, jo në këtë formë sic kanë vepruar”, ka theksuar ish-zv. ministri i arsimit, Azem Guri për Dukagjinin.

Të premten e ardhshme, të gjithë nxënësit do të nisin vitin e ri shkollor.

Pavarësisht kritikave të shumta, MAShT-i, ka vendosur që këtë vit të subvencionojë prindërit, pasi siç ka thënë, nuk kanë arritur marrëveshje me shtëpitë botueses për furnizim me libra sikurse viteve të kaluara.