Ish-kryeministri i Shqipërisë, Sali Berisha, përpos që ka “zbuluar” pretendimet e Serbisë për territore në Kosovë, duke thënë se përpos veriut të Mitrovicës, dëshiron ta marrë edhe Pejën, ka zbuluar edhe një refuzim që i kishte bërë Shteteve të Bashkuara të Amerikës.

“Para nja 5 vitesh më vjen një mesazh nga Departamenti i Shtetit, direkt nga Sekretarja e Shtetit dhe më kërkon a mund të bësh një deklaratë, për të mbështetur -ishin bisedimet të nesërmen në Bruksel. A mund të bësh një deklaratë më thotë? Jo i thashë, nuk e bëj. I thuaj sekretares se unë deklaratën do ta bëj pasi ata të vendosin se unë vetëm kështu i ndihmoj ata. Në qoftë se u bëj deklaratë përpara dhe shqiptarët shohin se ata janë si punë shkopi i Tiranës, ata zhvleftësohen, Beogradi merr revansh. Nuk e pata të lehtë, por i qëndrova parimit tim”, ka thënë Berisha në intervistë për “syri.net”

Berisha ka folur edhe për trenin duke e quajtur përpjekje për aneksim të veriut.

“Treni pa diskutim ishte përpjekje aneksioniste. Eci, eci aventurier. Nuk është vetëm atje”, ka thënë Berisha./Insajderi.com