Përfaqësuesit e dhjetë komunave me shumicë serbe kanë vendosur sot në Zveçan që mos ta njohin Mirjana Jevtiqin për ministre të Pushtetit Lokal dhe kanë hedhur poshtë mundësinë e çfarëdo bashkëpunimi me të, shkruan Klan Kosova.

Në konkluzionet e miratuara unanimisht nga kjo mbledhje thuhet se këto komuna ndërprenë secilin kontakt dhe bashkëpunim me anëtarët e Lëvizjes së Socialistëve në të gjitha institucionet e Kosovës.

Ata fajësojnë këtë subjekt politik për futjen e përçarjes në mes serbëve të Kosovës.

Kryetarët e komunave, përveç Dragan Jablanoviqit të Leposaviqit që nuk mori pjesë në mbledhje, kanë konstatuar se ministri Lubomir Mariq është shkarkuar nga një grup I deputetëve serb dhe kundër vullnetit të shumicës.

Në takimin e sotëm morën pjesë kryetarët e Zveçanit, Veriut të Mitrovicës,  Zubin Potokut, Graçanicës, Shtërpcës, Ranillukut, Kllokotit, Parteshit e Novobërdës. Ndërkaq, Leposaviqi përfaqësohej nga kryetari i kuvendit.