Deri më tani janë dorëzuar 15 amendamente në tekstin e rekomandimit për pranimin e Kosovës në Këshillin e Evropës, i cili nesër do të debatohet nga deputetët e Asamblesë Parlamentare të KiE’së.

Amendamenti i nëntë i delegacionit serb ndryshon tekstin në mënyrë që Kuvendi të kërkojë nga Komiteti i Ministrave që të shtyjë vendimin për kërkesën për anëtarësim të Kosovës, sipas Danas, përcjell Gazeta Insajderi.

“Prandaj Kuvendi i rekomandon Komitetit të Ministrave që të shtyjë vendimin për aplikimin për anëtarësim derisa Këshilli i Sigurimit i Kombeve të Bashkuara të përcaktojë apo miratojë përfundimisht statusin e Kosovës dhe Metohisë”, thuhet në amendamentin e propozuar nga anëtarët e delegacionit serb.

Presidenti i Serbisë, Aleksandar Vuçiq, ka thënë sot se beson se me përpjekjet e Francës, vendimi për pranimin e Kosovës në Këshillin e Evropës mund të shtyhet më 16 maj në mbledhjen e Komitetit të Ministrave. /Insajderi.org/