Francezët thonë “Cherchez la Femme” (Sherri vjen nga Gruaja).

Burrit rumun të modeles shqiptare Anxhela Martini, Dragos Savulescu i janë vënë prangat nga policia greke dhe “faji” për këtë po i vihet bashkëshortes së tij. Sipas portalit rumun G4Media.ro arrestimi në Mikonos i milionerit që kërkohej për abuzime me fondet publike në vendin e tij, u bë pasi policia pikasi fotot që Anxhela Martini kishte hedhur në instagram nga pushimet në Mykonos.

Filimisht lajmi është bërë i ditur nga Protothema, e cila në një artikull të publikuar sot ka shkruar mbi arrestimin e dy personave të cilët bënin një jetë luksoze në Mykonos duke shpenzuar shifra marramendëse në restorante dhe jahte.

Savulescu është dënuar me 5.5 vjet burg për përfshirjen e tij në një skandal të madh ekonomik në Rumani dhe përfshin përvetësimin e parave publike.

Dragoș Savulescu, i cili në fillim të vitit 2019 u arrestua dhe u dënua me 5.5 vjet burg për përvetësim, së bashku me ish-kryebashkiakun e Konstancës, Radu Mazare, Cristi Borcea, ish-president i Dinamos dhe të pandehur të tjerë që u shpallën fajtorë për përvetësimin e një totali prej 114 milionë eurosh.

Pas vendimit të autoriteteve gjyqësore, ai u arratis në Napoli, për t’u arrestuar përfundimisht ditën e djeshme në Mykonos nga Rojet Bregdetare, të cilët së bashku me zyrtarët e policisë së Mykonos organizuan një operacion të madh për arrestimin e tij.

Urdhri i arrestit për Savulescu u lëshua nga Interpoli me kërkesë të autoriteteve rumune për pjesëmarrje në një organizatë kriminale dhe për mashtrim kundër shtetit.

Mediat rumune njoftojnë se falë piruretave, pas largimit në Itali ai i ishte nënshtruar një procesi gjyqësor në Napoli falë të cilit e kishte shndërruar dënimin e tij në një dënim me kusht. Për këtë arsye Dragos Savulescu, mund të lëvizte i lirë në tokën italiane por ndaj tij vihej në punë dosja e interpolit nëse ai dilte jashtë kufijve të këtij shteti.

Me sa duket për ti bërë qefin gruas së tij të bukur, ai ka zgjedhur të riskojë duke kaluar disa ditë pushimi në Mykonos gjë që ka rezultuar fatale për të. Portali rumun G4Media.ro ka publikuar edhe foton që mendohet se është bërë shkak për pikasjen nga policia ku bashkeshorti i Martinit që pozon në plan të parë duket në sfond.

Historia e Dragos Savulescu dhe Anxhela Martinit ka qenë shumë e ndjekur në mediat shqiptare. Që nga dasma e tyre ne Los Anxhelos dhe deri tek ditlindjet faraonike që burri i organizonte dhe modelja shqiptare i postonte në rrjetet sociale.

Po me sa duket ka qene kjo mani për të afishuar jetën luksoze pa droje që këtë herë ka rezultuar fatale. Sepse sipas mediave rumune Dragos Savulescu, këtë herë është prangosur për faj të instagramit të bashkëshortes së tij.