Presidenti i Serbisë, Aleksandar Vuçiq, nesër do të takohet me përfaqësuesit e vendeve të QUINT-it, me të cilët u tha se do të bisedojë për situatën në veri të Kosovës.

Sipas Presidencës serbe, ai do të takohet me përfaqësuesit e Shteteve të Bashkuara të Amerikës, Britanisë së Madhe, Francës, Italisë dhe Gjermanisë, si dhe me shefin e delegacionit të Bashkimit Evropian në Beograd, duke filluar nga ora 09:00 e mëngjesit.

Ambasadorët e QUINT-it sot në mëngjes kanë zhvilluar një takim me kryeministrin e Kosovës, Albin Kurti, ndërsa gjatë ditës ka pasur tensione të reja në veri të Mitrovicës, ku policia e Kosovës ka arrestuar serbin Milun Milenkoviq, i njohur me nofkën Llune.

Llune dyshohet se ka qenë edhe organizatori kryesor i sulmeve ndaj forcave të KFOR-it dhe Policisë së Kosovës në Zveçan para dy javësh.

E drejtori i zyrës për Kosovën në Serbi, Petar Petkoviq ka thënë se Vuçiq ka biseduar disa herë sot me emisarin evropian për dialog, Miroslav Lajçak, por edhe me zyrtarë të shumtë ndërkombëtarë “për të bërë presion ndaj Kurtit”.

Petkoviq ka bërë të ditur se nesër në Beograd vjen edhe komandanti i KFOR-it, me të cilin sipas tij, do të bisedojnë Vuçiq dhe gjenerali serb, Milan Mojsiloviq.