Kandidati i koalicionit qeverisës për president të Kosovës, Hashim Thaçi që momentalisht është zëvendëskryeministër dhe ministër i Punëve të Jashtme, ka bërë një deklaratë të cilën nuk e ka përmendur asnjëherë.

Duke folur për vendimin e Gjykatës Kushtetuese për Asociacionin e Komunave Serbe në Kosovë, Thaçi ka thënë se pozita dhe opozita duhet ta hartojnë së bashku statutin e këtij organi.

“Gjykata Kushtetuese ka sugjeruar dhe obliguar krijimin e Asociacionit në bazë të Kushtetutës së Kosovës. Ftoj që të vijnë ekspertët e opozitës, të shkruhet statuti dhe t’i hyjmë normalitetit”, ka thënë Thaçi në një intervistë për emisionin “Monitor” në televizionin publik.

Sipas Thaçit është e rëndësishme që të gjithë partitë politike dhe institucionet e Kosovës të punojnë së bashku për të kaluar secilën sfidë të shtetit të Kosovës.