Partia Demokratike e Kosovës do të mbajë sot konferencë për media. Aty njoftohet se do të flasin tre zyrtarë të lartë të saj.

Abelard Tahiri, shef i Grupit Parlamentar, Ferat Shala, Kryetar i Komisionit për Ekonomi dhe Blerand Stavileci, anëtar i Kryesisë.

Arsyeja e kësaj konference s’është bërë e ditur, por ditët e fundit PDK ka kritikuar qeverinë e Albin Kurtit për një varg çështjesh.

Deputeti Ferat Shala, i cili do t’u drejtohet mediave, këtë javë në Kuvendin e Kosovës tha se qeveria po ndërhynë me punësime në institucionet e pavarura. Këtu ai përmendi konkursin në Korporatën Energjetike të Kosovës ku u punësuan qindra persona.

Ai kishte thënë se me veprimet e tilla do të duhej të merreshin organet e drejtësisë.

Po në Kuvend, Shala, kishte pyetur ministren e Ekonomisë, Rozeta Hajadri, se pse ishin përdorur fonde të kredisë nga Banka Botërore për expo-Dubai.

Partia e Memli Krasniqi, prej kohësh ka paralajmëruar themelimin e Kabinetit të Qeverisjes së mirë, gjë e cila ende nuk është realizuar.