Presidenti amerikan Donald Trump tha se beson që praktika e derdhjes së ujit mbi fytyrën e dikujt të mbuluar me një leckë për të imituar mbytjen, e cila quhet “Waterboarding”, do të shërbente për parandalimin e radikalizmit.

Në një intervistë për ABC News, Trump tha se do të konsultohet me sekretarin e mbrojtjes James Mattis dhe drejtorin e CIA-s Mike Pompeo për ndërmarrjen e disa hapave ndaj grupeve radikale që i presin kokat njerëzve në Lindjen e Mesme.

Mirëpo ish-drejtori i CIA-s, Leon Paneta deklaroi se do të ishte një gabim i madh nëse ShBA kthehet pas dhe përdor torturën. Por, sipas Trump, qëllimi i tij i vetëm është të garantojë sigurinë e ShBA-së.

“Shteti Islamik i bën të krishterëve gjëra që nuk dëgjoheshin që prej Mesjetës. Kam folur me personat në nivelet më të larta të inteligjencës dhe kur i kam pyetur nëse “waterbording” apo torturat funksionojnë, më kanë thënë se po. Personalisht mendoj se waterboarding funksionon”, deklaroi Trump.

Gjatë fushatës elektorale, Presidenti i ri sugjeroi se mund të autorizonte përdorimin e “waterboarding” apo edhe masa më ekstreme mbi të dyshuarit për terrorrizëm. Por, më pas e zbuti qëndrimin e tij, duke thënë se kurrë nuk do të urdhëronte ushtrinë të shkelte ligjet ndërkombëtare.