Presidenti Donald Trump do të vendosë tarifë befasuese prej 104% në të gjitha importet kineze të mërkurën, njoftoi të martën sekretarja e shtypit e Shtëpisë së Bardhë Karoline Leavitt.

Kina megjithatë priste rritje të tarifave për 34% të mërkurën, si pjesë e paketës tarifore “reciproke” të Trump. Por, presidenti amerikan vendosi 50% të tjera pasi Pekini nuk tërhoqi premtimin e tij për të vendosur tarifa hakmarrëse prej 34% për mallrat amerikane deri të martën, duke shtuar 84% shtesë në tarifa, raporton CNN, përcjell Insajderi.

Më herët të martën, Ministria e Tregtisë e Kinës tha se “kundërshton me vendosmëri” tarifat shtesë prej 50% për importet kineze, duke e quajtur atë “një gabim mbi gabim”. Ministria u zotua të përshkallëzojë hakmarrjen ndaj eksporteve të SHBA.

Trump fillimisht vendosi tarifë 10% për të gjitha mallrat kineze në shkurt, pa përjashtime, duke e lidhur atë me rolin e pretenduar të vendit në ndihmën e imigracionit të paligjshëm dhe futjen e fentanilit në SHBA. Muajin e kaluar, ai dyfishoi normat.

Kina ishte burimi i dytë më i madh i importeve të Amerikës vitin e kaluar, duke dërguar mallra në vlerë prej 439 miliardë dollarësh, teksa SHBA eksportoi mallra me vlerë 144 miliardë dollarë në Kinë. /Insajderi.org/