Këshilli i Etikës i Universitetit të Prishtinës, ka rekomanduar që profesori Xhevat Krasniqi, i cili u denoncua nga 27 studente të Fakultetit të Mjekësisë për ngacmim seksual të suspendohet.

Insajderi ka mësuar se nga Këshilli i Etikës janë duke pritur përgjigjen e rektorit dhe nesër pritet të merret vendimi për suspendimin e tij.

Rikujtojmë se gjatë ditës dhjetëra studentë kanë bllokuar hyrjen para rektoratit, gjersa po mbahej mbledhja e Këshillit të Etikës të UP’së.

Protesta u mbajt pasi që studentët ishin të revoltuar që ende nuk është marrë ndonjë vendim lidhur me profesorin Xhevat Krasniqi, i cili është i dyshuar për ngacmim seksual.

Gjatë mbledhjes së sotme Këshilli i ka kërkuar Fakultetit të Mjekësisë që ta ridërgojë edhe njëherë listën e nënshkrimeve të studenteve denoncuese në afat prej një jave, pasi që sipas tyre profesori Krasniqi pretendon se 9 prej tyre janë të falsifikuara.

Xhevat Krasniqi ende vazhdon të figurojë si profesor i rregullt në Fakultetin e Edukimit, mirëpo jo edhe në Fakultetin e Mjekësisë ku kishte qenë i angazhuar si profesor i matematikës.