Patriarku i Kishës Ortodokse Serbe Irinej vdiq sot në moshën 90 vjeçare.

Patriarku Irinej ishte kreu i 45-të i Kishës Ortodokse Serbe.

U emërua patriark më 23 janar 2010.

Ai lindi më 28 gusht 1930 si Miroslav Gavriloviq. Kur u bë murg, mori një emër të ri – Irinej.

Ashtu si shumica e priftërinjve të Kishës Ortodokse Serbe, ai ushqeu simpati të fortë për kriminelët e luftës dhe nacionalistët serbë.

Kur Ratko Mlladiq u dënua me burgim të përjetshëm në vitin 2017 me një vendim të shkallës së parë, ai tha se këto ishin “vepra djallëzore” të kryera nga fuqitë botërore.

“Ne e dinim që Ratko Mlladiq do të dënohej dhe se gjithçka do të ishte kështu, dhe për fat të keq, nuk mund të bëjmë asgjë për këtë. E gjithë kjo po ndodh sepse fuqitë e mëdha botërore po bëjnë vepra djallëzore dhe ne po vuajmë pasojat”, ka pretenduar kreu i Kishës Ortodokse Serbe.

Ai shtoi në atë kohë se “është padrejtësi që vetëm gjeneralët serbë gjykohen në Hagë, ndërsa të gjithë të tjerët lirohen”.

Irinej ishte një kundërshtar i rreptë i çdo dialogu me Kosovën, dhe posaçërisht që Serbia të njihte pavarësinë e Kosovës.

“Ne nuk duhet t’i nënshtrohemi presioneve që do të çonin në njohjen de facto të Kosovës, as nuk duhet të heqim dorë nga pjesa jonë e territorit për hir të Evropës”,ka deklaruar ai me një rast.

Ai gjithashtu këmbëngulte që Mali i Zi të tërheqë njohjen e Kosovës.

Patriarku serb ishte shumë i afërt me kriminelin serb Sllobodan Millosheviqin.

Në ato kohë, mediat shpesh spekulonin se ai ishte bashkëpunëtori më besnik i Millosheviqit në Kishën Ortodokse Serbe dhe se ai dëshironte ta shihte atë si patriark./Insajderi.org.