Kryetari i Kuvendit, Kadri Veseli ka shprehur ngushëllime për familjen Mramori për dy fëmijët e kësaj familje që humbën jetën.

“Në emër të Kuvendit të Republikës së Kosovës, dhe në emrin tim personal, i shpreh ngushëllime familjes Mramori për humbjen tragjike të jetës së dy fëmijëve të saj Florentës dhe Florentit. Kjo është një tragjedi e rëndë që prekë zemrat, jo vetëm të familjes, por të secilit prej nesh, secilit qytetar të Kosovës, që aspiron një vend dhe ambient të sigurt për fëmijët dhe familjen e tij”, ka shkruar Veseli në Facebook.

Ai më tej ka thënë se institucionet duhet të thonë fjalën e tyre rreth këtij rasti.

“Përveç dhimbjes, është urgjente që institucionet e ligjit të thonë fjalën e tyre dhe të marrin vendimet e duhura e të shpejta për t’i nxjerrë para përgjegjësisë ligjore të gjithë ata që lejojnë dhe ata që krijojnë në ambientet tona sociale faktorë të tillë rreziku për jetën si ky që u mori jetën fëmijëve të familjes Mramori”, përfundon Veseli. /Insajderi.com