Ambasada e Republikës së Kosovës në Gjermani ka lëshuar një njoftim të rëndësishëm për shtetasit e Kosovës që janë regjistruar për të votuar me postë për zgjedhjet parlamentare.

Sipas njoftimit, të gjithë ata që janë të regjistruar për votim jashtë Kosovës, duhet të dërgojnë fletëvotimet në kutitë postare të Komisionit Qendror të Zgjedhjeve (KQZ) në Kosovë ose jashtë saj, duke ndjekur disa hapa të thjeshtë.

Hapi 1: Plotësimi i fletëvotimit

Shkarkojeni dhe printojeni fletëvotimin nga lidhja e dhënë.

Në anën e majtë të fletëvotimit do të gjeni listën e subjekteve politike. Zgjidheni një subjekt politik dhe në anën e djathtë mund të votoni deri në dhjetë kandidatë.

Pas plotësimit, palosejeni fletëvotimin dhe vendoseni brenda një zarf dhe mbylleni.

Hapi 2: Dërgimi i fletëvotimit

Printoni dëftesën e regjistrimit që keni marrë përmes email-it gjatë regjistrimit.

Vendoseni fletëvotimin e mbyllur dhe dëftesën e regjistrimit brenda një zarfi të dytë.

Mbi zarfin e dytë, shkruajeni adresën e kutisë postare të KQZ-së dhe vendoseni një pullë postare.

Dërgojeni zarfin në postën më të afërt të shtetit ku jetoni.

“Kujdes! Fletëvotimi duhet të jetë individual dhe nuk mund të përfshini fletëvotime për anëtarët e familjes.

Zarfi duhet të ketë pullën postare dhe të dërgohet nga shteti ku jeni regjistruar. Për ndihmë dhe informacione shtesë, mund të kontaktoni linjën ndihmëse të KQZ-së përmes WhatsApp dhe Viber në numrin: +383 46 61 00 61”, thuhet në njoftim.

Kujtojmë se nga sot e deri më 8 shkurt, mbi 100 mijë shtetas të Kosovës që jetojnë jashtë vendit do të mund të votojnë me postë për zgjedhjet parlamentare të Kosovës më 9 shkurt.