Presidenti i Serbisë, Aleksandar Vuçiq, tha se zgjedhjet atje do të mbahen më së voni në shtator dhe se për këtë do t’i informojë qytetarët më 26 maj.

“Nuk është problemi nëse jeni pro zgjedhjeve, më 26 maj do të njoftoj popullin, do të shkojmë në zgjedhje, do të thotë se do të shkojmë në zgjedhje maksimumi në shtator”, deklaroi ai, sipas mediave serbe, përcjell Gazeta Insajderi.

Vuçiq njoftoi po ashtu se do të japë dorëheqje nga posti i kryetarit të Partisë Progresiste serbe.

“Për këtë duhet të prisni vetëm 26 majin dhe asgjë më shumë. Askush këtu nuk ruan karriget e askujt dhe këtë do ta shihni shumë qartë”, deklaroi ndër të tjera ai.

Njoftimi i Vuçiqit vjen pas protestës masive në Beograd për kundërshtimin e akteve të dhunshme që ndodhën gjatë këtij muaji në Serbi. /Insajderi.org/