Ministri i Punëve të Brendshme të Serbisë, Aleksander Vulin, ka reaguar pas takimit të sotëm në Greqi ndërmjet kryeministrit të Kosovës, Albin Kurti dhe kryetarit të Presidencës Boshnjake, Shefik Xhaferoviq.
Vulinit i ka penguar deklarata e Xhaferoviq për thellimin e raporteve të Bosnje e Hercegovinës me Republikën e Kosovës, duke thënë se Xhaferoviq po e shkel pozicionin e Bosnjës për një çështje të tillë.
Derisa s’ka ngurruar që ta kërcënojë Bosnjën, duke thënë se një vend që “synon të copëtojë Serbinë”, s’mund të shpjegojë më pas se pse vendet tjera s’mund t’ia ndryshojnë kufijtë.
“Kur Xhaferoviq shkon te Kurti dhe i premton bashkëpunim me shtetin e rrejshëm të Kosovës, shkel qëndrimin zyrtar të Bosnje e Hercegovinës se Kosova është pjesë e Serbisë. Kushdo që dëshiron që ta copëtojë Serbinë vështirë se mund të shpjegojë pse vendet tjera nuk mund të ndryshojnë kufijtë e tyre, veçanërisht Bosnja e Hercegovina”, ka thënë Vulin për media serbe, përcjellë Demokracia.com.
Tutje Vulin ka thënë se “edhe Xhaferoviqi dhe Kurtin hanë bukë serbe”, prandaj sipas tij “e urrejnë Serbinë”.
“Shpresoj se Bashkimi Evropian dhe bashkësia ndërkombëtare do ta dënojnë shpejt kërcënimin e Xhaferoviq për paqen dhe stabilitetin në Bosnje dhe Hercegovinë dhe në rajon”, ka thënë Vulin.
Vulin njihet për fjalorin fyes ndaj Kosovës dhe shqiptarëve në përgjithësi. Ai e përdor termin fyes ‘shiptari’ kur flet për shqiptarët e Kosovës.
Takimi Kurti-Xhaferoviq ka ndodhur në kuadër të Forumit Ekonomik të Delphit në Greqi.