Kur kanë mbetur vetëm edhe një ditë para protestës, përfaqësuesit e partive opozitare i kanë numëruar edhe një herë arsyet se vendi duhet të ketë protesta dhe zgjedhje të reja.

Për më tepër, në një tubim mobilizues me gratë e tri partive opozitare – Lëvizjes Vetëvendosje, Aleancës për Ardhmërinë e Kosovës dhe Nismës për Kosovën – u tha se Qeveria e Kosovës do të bijë në ditën kur vendi shënon tetë vjetorin e pavarësisë.

“Opozitarizmi ynë nuk është ndaj shtetit por është ndaj politikave të këtij pushteti sepse janë të dëmshme si për burra e për gra”, ka thënë Nazlie Balaj nga Lëvizja Vetëvendosje.

“Në tetë vjetorin e pavarësisë, pushteti do te bijë”, ka shtuar ajo.

Në anën tjetër, Fatmir Limaj nga Nisma për Kosovën, ka inkurajuar qytetarët që t’i bashkohen protestës popullore.  Ai po ashtu ka lëvduar rolin e gruas në organizmin e protestës.

Kryetari i AAK-së, Ramush Haradinaj, ka thënë se Qeveria e Kosovës ka nënshkruar marrëveshje me armikun tonë, duke iu referuar marrëveshjes për themelimin e Asociacionit të Komunave me shumicë serbe të nënshkruar nga Kryeministri Isa Mustafa me homologun e tij serb.

“Ky pushtet po i humb nervat rasti –  me i freskët e dëshmon hera e fundit ku kanë arrestuar aktivistët” ka thënë Haradinaj.

Protesta e nesërme e organizuar nga partitë opozitare është thënë se do të jetë më masivja që nga paslufta.  Opozita është duke kundërshtuar nënshkrimin e dy marrëveshjeve nga ana e Qeverisë së Kosovës: me Serbinë për themelimin e asociacionit dhe me Malin e Zi për demarkacionin kufitar.

Në anën tjetër, Kryetari i Lëvizjes Vetëvendosje, Visar Ymeri, ka thënë se Kryeministri Isa Mustafa e zëvendësi i tij, Hashim Thaçi, “ikin si pula prej Albulena Haxhiut, Donika Kadaj-Bujupit, e deputetëve të tjera.”.Insajderi