Gjatë një fjalimi emocional para mijëra njerëzve në përvjetorin e parë të tentim puçit të dështuar ushtarak në Turqi, presidenti i Turqisë, Recep Tayyip Erdogan, është zotuar se do t’ua heqë kokat tradhtarëve.

Erdogan tha para turmës që po valëviste flamuj turq se tentimi për t’i dhënë fund sundimit të tij më shumë se një dekadë të gjatë nuk ishte sulmi i parë kundër Turqisë dhe nuk do të jetë as i fundit.

“Pikërisht në këtë ditë para një viti, diku në këtë orë, ndodhi një tentim i pabesë”, ka thënë Erdogan.

Duke iu referuar një seri sulmesh terroriste që e goditën Turqinë gjatë vitit të fundit, Erdogan pati një porosi për ata të cilët ai i quajti tradhtarë.

“Për këtë arsyeje, së pari do t’ua këpusim kokat këtyre tradhtarëve”, ka thënë ndër tjera Erdogan, transmeton Express.

Erdogani mori pjesë në marshin kombëtar të unitetit në Stamboll, duke u bashkuar në Urën e Martirëve të 15 Korrikut, dikur e njohur si Ura e Bosforit, për t’i kujtuar 250 njerëzit që vdiqën më 15 korrik të vitit të kaluar duke u përpjekur ta ndalonin puçin.