Kryeministri i Britanisë, David Cameron, është ftuar të dalë përpara ligjvënësve që janë duke hetuar rolin e Britanisë në Libi.

Ky është një hap i pazakonshëm që pason kritikat e Shteteve të Bashkuara për rolin e tij në ndërhyrjen e vitit 2011 në Libi dhe spekulimet për një ndërhyrje të re atje.

Kreu i Komisionit për Punë te Jashtme i Parlamentit britanik, Crispin Blunt, ka thënë se ka ftuar Cameronin në “frymën e hetimeve të drejta dhe të hapura”.

Cameron shfaqet para komitetit koordinues – një mbledhje e veçantë e kryetarëve të komisioneve parlamentare – dy herë në vit, por rrallë paraqitet personalisht përpara komiteteve të tjera.

Ky veprim vjen pasi presidenti i Shteteve të Bashkuara, Barack Obama, ka kritikuar Cameronin dhe ish-presidentin e Francës, Nicolas Sarkozy, për humbje të interesit pas fushatës së përbashkët të bombardimeve që ka çuar në rrëzimin e udhëheqësit libian, Muammer Ghadafi, në vitin 2011.

Këtë javë, Ministria e Mbrojtjes e Britanisë po ashtu është detyruar të mohojë se është duke planifikuar të zgjerojë fushatën bombarduese kundër grupit Shteti Islamik në Libi, ose të dërgojë trupa për të forcuar sigurinë atje.