Gjithsej 33 anije mallrash që transportonin rreth 719,549 ton mallra ushqimore janë larguar nga Ukraina sipas një marrëveshjeje të ndërmjetësuar nga Kombet e Bashkuara dhe Turqia për të zhbllokuar portet detare të Ukrainës, tha ministria e bujqësisë ukrainase.

Qendra e Përbashkët Koordinuese në Turqi që monitoron zbatimin e marrëveshjes vendosi sasinë totale të drithërave dhe produkteve ushqimore të eksportuara nga tre porte ukrainase të Detit të Zi që nga arritja e marrëveshjes në 721,449 ton, shkruan The Guardian.

Eksportet e drithërave të Ukrainës ranë pasi Rusia pushtoi vendin më 24 shkurt dhe bllokoi portet e saj në Detin e Zi, duke rritur çmimet globale të ushqimit dhe duke shkaktuar frikë për mungesa në Afrikë dhe Lindjen e Mesme.

Tre porte të Detit të Zi u zhbllokuan sipas marrëveshjes së nënshkruar më 22 korrik nga Moska dhe Kievi.

Përveç anijeve që tashmë janë larguar nga Ukraina, ministria e bujqësisë tha se edhe 18 të tjera tani po ngarkonin ose prisnin lejen për t’u larguar nga portet e Ukrainës.

Ministria tha se eksportet e grurit ukrainas mund të arrijnë në 4 milion ton në gusht, krahasuar me 3 milion ton në korrik.