Ministrja e Drejtësisë, iu ka kërkuar autoriteteve serbe që t’i transferojnë në Kosovë Nezir Mehmetaj dhe Petrit Dula, që po mbahen në burg për krime lufte. Në letrën drejtuar Ministrisë serbe të Drejtësisë, Haxhiu tha se Mehmetaj e Dula janë qytetarë të Kosovës që duhet të jenë nën mbrojtjen e Kosovës, ndërsa procesi i tyre gjyqësor, sipas ministres ka pasur shkelje të rënda të të drejtave të njeriut.
“Ndjekja e krimeve të luftës ndërlidhet me juridiksionin, e ky i fundit me vendin ku krimi i pretenduar ka ndodhur. Pasiguria juridike që krijohet në rastin e ndjekjes së krimeve të luftës jashtë juridiksionit, konfirmohet edhe nga raportet ndërkombëtare që trajtojnë këtë temë. Për këtë, mbajtja e mëtejme e z.Mehmetaj dhe z.Dula në burgjet e Serbisë, kur ndjekja penale sjellë pikëpyetje mbi cilësinë dhe të vërtetën mbi krimet e pretenduara, përfshirë këtu shqetësimet mbi shkeljet e të drejtave të njeriut, vë në pikëpyetje përpjekjet për të nxjerrë dritë mbi të vërtetën”, thuhet në letrën e Haxhiut drejtuar homologes serbe, Maja Popovic.
Sipas Haxhiut, rastet e Mehmetajt dhe të Dulës do të trajtohen në bazë të Kushteturës së Kosovës si dhe ligjeve në fuqi.
Materialet e publikuara nuk mund të kopjohen ose përdoren pa lejen paraprake të redaksisë së Insajderit.
© 2016-2025 Gazeta Online Insajderi - Të gjitha të drejtat e rezervuara.
