Kryeministri Albin Kurti, pas një qëndrimi tre ditorë në Shtetet e Bashkuara të Amerikës, është kthyer në Kosovë. Ai për këto tri ditë nuk është takuar me ndonjë zyrtarë të lartë amerikanë.
Kurti kishte ftesën nga familja Albright, për ceremoninë e varrimit të ish-sekretares së SHBA, Madeline Albright, e cila ndërroj jetë pak javë më parë.
Ai atje kishte udhëtuar me presidenten Vjosa Osmani.
Për dallim nga presidentja e cila kishte një agjendë më të ngjeshur të takimeve, kryeministri Kurti shumicën e takimeve i pati jo-formale.
Ai takime të shkurta e nga një foto ka arritur ta bëjë me Sekretarin amerikan të Shtetit, Antony Blinken, ish-presidentin e SHBA’së, Bill Clinton, ish-zëvëndëspresidentin, Albert Gore, ish-sekretarët e Shtetit Hillary Rodham Clinton, Condoleezza Rice dhe John Kerry, si dhe ish-kongresistin Eliot Engel.
Por, tamam takim, ulur në zyre, ka zhvilluar vetëm me shoqen e tij, amerikanen Alice James, e cila është themeluese e ‘Kosova Action Network’ (KAN), organizatë kjo nga e cila më pas ka lindur edhe Lëvizja Vetëvendosje.
Të vetmin takim formal Kurti e ka realizuar me këshilltarin e Departamentit të Shtetit të Shteteve të Bashkuara të Amerikës, Derek Chollet.
Kurti ka thënë se ka qenë i nderuar nga ftesa e këshilltarit të Departamentit të Shtetit.
“I nderuar nga Ftesa e Chollet në Departamentin e Shtetit, për takimin tonë të parë personal. Presim vazhdimin e bashkëpunimit dypalësh me SHBA për vlerat dhe prioritetet e përbashkëta”, ka shkruar Kurti.
Ky është takimi i parë dhe i fundit i Kurtit me një zyrtar amerikan sa ishte në SHBA.
Honored by @CounselorDOS Chollet’s invitation to the @StateDept for our first in-person meeting. Look forward to continuing bilateral cooperation with 🇺🇸 on shared values and priorities. https://t.co/OkE6t1Xg46
— Albin Kurti (@albinkurti) April 30, 2022
Për kthimin e tij në Kosovë, ka njoftuar sot Zyra e Kryeministrit, ku ka bërë të ditur se ai ka bërë homazhe sot te Kompleksi Memorial i dëshmorëve në Marinë, të Skenderajt, në 23 vjetorin e rënies heroike të komandantit Ilaz Kodra.