Inspektorati Policor i Kosovës ka bërë të ditur se polici në Pejë që u arrestua si i dyshuar për veprën penale “rrezikim i trafikut publik” ishte jashtë detyrës zyrtare.

Në njoftimin e IPK’së, të cilët bëjnë të ditur se ishin në vendngjarje, thuhet se policit që dyshohet se shkaktoi aksidentin në Qyshk të Pejës me lëndimin e një këmbësorje i është caktuar masa e ndalimit 48-orësh, shkruan Insajderi.

LEXO EDHE:

Komunikata e IPK:

IPK është informuar nga Policia e Kosovës për një aksident me lëndime të rënda trupore në rrugën magjistrale Prishtinë – Pejë në fshatin Qyshk, ku në aksident është i përfshirë një zyrtar policor me veturë civile dhe jashtë detyrës zyrtare.

Aksidenti raportohet të ketë ndodhur sot rreth orës 16:00 ku janë përfshirë një automjet (të cilën ishte drejtuar zyrtari policor jashtë detyrës zyrtare) dhe një këmbësore .

Pas pranimit të kësaj informate, IPK menjëherë i është përgjigjur rastit si dhe njësitet tjera relevante policore, përderisa personi i lënduar në këtë aksident është dërguar për tretman mjekësor.

Bazuar në veprimet e ndërmarra hetimore të ndërmarra deri tani dhe pas përfundimit të këqyrjes së vendit të ngjarjes,  zyrtari policor është arrestuar me dyshimin se i njëjti ka kryer veprën penale “rrezikim i trafikut publik”.

Të njëjtit me aktvendim të prokurorit i është caktuar masa e ndalimit për 48 orë.

Veprime të tjera do të ndërmerren në përputhje me autorizimet ligjore të IPK-së dhe në koordinim me prokurorinë kompetente.

Inspektorati Policor i Kosovës ka bërë të ditur se polici që u arrestua si i dyshuar për veprën penale “rrezikim i trafikut publik” ishte jashtë detyrës zyrtare. /Insajderi.org/