Kryetari i Suharekës, Bali Muharremaj ka pozuar sot së bashku me punëtoret e krahut. Ky postim i tij vjen një ditë pas arrestimit të dy zyrtarëve të kësaj komunë. Ata dyshohet se kanë kryer veprën penale “keqpërdorim i pozitës apo autoritet zyrtar”.

Muharremaj sot ka postuar fotografi në profilin e tij në “Facebook” me disa punëtorë.

Ai ka shkruar: Mes atyre që prioritet e kanë mirëqenien e familjes.

Enver Shabani drejtor i Shërbimeve në Suharekë dhe Berat Kabashi zyrtar ne drejtorinë e shërbimeve publike/menaxher i kontratës ranë në pranga pas raportimit të Gazetës Insajderi.

Shabani dhe Kabashi dyshohet se kanë përfituar nga detyra e tyre duke shkelur ligjin e Prokurimit Publik. Prokuroria Themelore në Prizren, Prokurori i Shtetit Petrit Kryeziu ka nisur hetimet lidhur me këtë rast që qoi në arrestimin e dy zyrtarëve.

“Të pandehurit: Berat Kabashi dhe Enver Shabani prej datës 18.05.2022 deri ma datë 12.12.2022 në Suharekë duke vepruar në cilësi të personave zyrtarë dhe atë Berat Kabashi në cilësinë e menaxherit dhe Enver Shabani në cilësinë e mbikëqyrësit të drejtpërdrejtë duke shfrytëzuar detyrën nuk i përmbushin detyrat zyrtare me qëllim që të përfitojnë çfardo dobie për vete dhe personat e tjerë“, thuhej në dokumentin të cilin e ka parë Insajderi.