![](https://insajderi.org/wp-content/themes/insajderi-org/logo/menu-insajderi.png)
Një tender i fituar nga Edmond Shahini, pronar i ‘Mektrin Motors’, është vënë nën “llupën” e hetimeve të SPAK’ut në Shqipëri. Kjo, pasi që dyshohet se ai tenderin e fitoi në mungesë të konkurrencës dhe me fond të limituar. Shahini është parë i afërt me nënkryetarin e Komunës së Prishtinës, Alban Zogajn, i cili ka qenë prezent për t’ia prerë shiritin biznesit të tij të ri në rrugën Prishtinë-Lipjan.
Siç raportojnë mediat në Shqipëri, kryetarja e Bashkisë së Durrësit, Emiriana Sako, dha dëshmi në Prokurorinë e Posaçme të premten për shkak të tenderit që ia kishte dhënë Edmond Shahinit, shkruan Gazeta Insajderi.
Sipas mediave atje, Shahini është kunati i kryebashkiakes.
Tenderi në fjalë është shenjuar me flamur të kuq nga ana e Open Data Albania. Arsyeja është mungesa e konkurrencës. Dhe fondi limit.
Fondi limit i tenderit është afro dy milionë euro, teksao ferta ishte mbi 99 për qind të vlerës së fondit limit.
Mediumi ‘Prapaskena’ paralajmëroi në një raportim të tyre se ekziston një aktivitet i dyshimtë i Edmond Shahinit në Itali gjatë viteve 2005-2010.
Nga viti 2008, Edmond Shahini nisi të investonte para me burim të dyshimtë në biznese në Durrës, kryesisht në hapjen e pilave të servisit, shitje me shumicë e pakicë të veturave dhe pjesëve të tyre, dhënie me qira e automjeteve të çdo lloji, marrja e përfaqësisë në aktivitetin tregtar të automjeteve, tregtim karburantesh.
Mekrin Motors në vitin që shkoi solli në Kosovë përfaqësinë zyrtare të veturës ‘Land Rover’. Prezent në ceremoninë e hapjes ishte edhe nënkryetari i Komunës së Prishtinës, Alban Zogaj. Ky i fundit u pa duke prerë shiritin e biznesit të Shahinit, ndonëse nuk dihet se çfarë afërsie kanë mes vete. /Insajderi.org/