22:38 - 02 Qershor 2022

Zëvendëskryeministri dhe Ministri i Punëve të Jashtme të Maqedonisë së Veriut, Bujar Osmani, sot është takuar me sekretarin amerikan Anthony Blinken, për dallim nga kryeministri kosovar Albin Kurti, i cili nuk arriti që për gati tri javë të sigurojë një takim të kësaj rëndësie. 

Osmani pas takimit me Blinken ka thënë se ka qenë nder i veçantë të takohet me sekretarin Blinken.

“Falënderim i veçantë për dialogun e shkëlqyer strategjik, që po zhvillohet sot në Uashington nën patronazhin e Stejt Departamentit. Partneriteti strategjik ndërmjet dy vendeve hy në një fazë të re, më dinamike, të miqësisë, ndërkaq raportet bilaterale vendosen në një kornizë të re, më precize për zhvillimin e tyre të mëtejmë”, ka shkruar ai.

Osmani ka theksuar se SHBA-ja mbështet pa mëdyshje integrimin evropian të Maqedonisë së Veriut si një kontribut i rëndësishëm për stabilitetin dhe përparimin e të gjithë rajonit.

“Si aleatë të NATO-s i ndajmë principet dhe vlerat bashkëkohore demokratike dhe e dënojmë agresionin ushtarak rus ndaj Ukrainës”, ka shkruar ai.