Gjykata Themelore në Prizren i ka caktuar një muaj paraburgim shoferes e cila është e dyshuar për aksidentin e së dielës në Shirokë të Suharekës, ku vdiqën dy persona.
Këtë e bëri të ditur Marcel Lekaj, zëdhënës për media në Gjykatën Themelore të Prizrenit.
“Është aprovuar kërkesa për caktimin e paraburgimit ndaj të pandehurës M.G., për shkak të dyshimit të bazuar se në bashkëkryerje ka kryer veprën penale: rrezikimi i trafikut publik nga neni 370 par 9 (nëse vepra penale rezulton me vdekjen e një apo më shumë personave ) lidhur me par. 6 ( nëse vepra penale kryhet nga pakujdesia) dhe 1 të KP-së”, ka thënë Lekaj.
Prokuroria Themelore në Prizren kishte parashtruar kërkesë për caktimin e masës së paraburgimit ndaj M.G., e dyshuar për aksidentin e së dielës në Shirokë të Suharekës, ku vdiqën dy persona.